ප්‍රියන්ත කොළඹගේ නවතම සිනමා පටය
“විමුක්ති” “දැහැන”, “අරුමෝසම් වැහි” චිත්‍රපට මෙන්ම සිනමා ලෝලීන් ආදරයෙන් වැලඳගත් “ආදරණීය කතාවක්” සහ “දේදුනු ආකාසේ” චිත්‍රපට අධ්‍යක්ෂණය කළ ප්‍රියන්ත කොළඹගේ ගේ නවතම නිර්මාණය “මන්දාරා” මුහුරත් උලෙළ පසුගියදා කලාකරුවන් රැසකගේ සහභාගිත්වයෙන් ගල්කිස්ස මහ හෝටලයේදී පැවැත්විණි.
ප්‍රියන්ත කොළඹගේ “මන්දාරා” සමඟ නවතම නිෂ්පාදකවරයෙක් සිනමාවට ගෙන එයි. ඔහු මහේෂ් පෙරේරා ය. මහේෂ් පෙරේරා ගේ ප්‍රථම නිෂ්පාදනය වූ ‘මන්දාරා’ හි ලක්ෂ්මන් මෙන්ඩිස්, චාන්දනී සෙනෙවිරත්න, සේමිනි ඉද්දමල්ගොඩ, බිමල් ජයකොඩි, ප්‍රියංකර රත්නායක, චුලක්ෂි රණසිංහ, මාධනි මල්වත්ත, ඉසුරු ලොකුහෙට්ටිආරච්චි ඇතුළු පිරිස සමඟ “සකූ” ටෙලි නාට්‍යයේ “සකුනි” ලෙස රඟපෑ සහේලි සදිත්මා “මන්දාරා” සමඟ සිනමා නිළියක් වනු ඇත.
ප්‍රවීණ සහාය අධ්‍යක්ෂක ඩොනල්ඩ් ජයන්ත “මන්දාරා” සමඟ අධ්‍යක්ෂණයෙන් එක්වන අතර ප්‍රවීණ සම්මානනීය කැමරා අධ්‍යක්ෂ රුවන් කොස්තා මෙහි කැමරා අධ්‍යක්ෂවරයා වෙයි.
ඡායාරූප - ටෙනිසන් එදිරිසිංහ
