පසුගිය මාස තුනක පමණ කාල පරිච්ඡේදය තුළ කොරෝනාව විසින් ජනතාවගෙන් ඈත් කරන ලද සිනමාව යළි ඔවුනට සමීප කිරීමේ වෑයමක් වශයෙන් මෙතෙක් ප්‍රදර්ශනය නොකරන ලද අලුත්ම සිංහල චිත්‍රපට 6 ක සිනමා උළෙලක් පැවැත්වීමට සරසවි සහ ස්කෝප් සිනමා සංකීර්ණය තීරණය කර තිබේ. සැප්තැම්බර් මස 04 වෙනිදා සිට සැප්තැම්බර් 09 දක්වා අගනුවර ලිබර්ටි සිනමා හලේ දී මෙම සිනමා නිර්මාණ 06 ප්‍රදර්ශනය කෙරනු ඇත.
ඒ අනුව සැප්තැම්බර් 04 ජයන්ත චන්ද්‍රසිරිගේ “මිදුණු විශ්වය”, සැප්තැම්බර් 05 ගිරිරාජ් කෞශල්‍යගේ “කතුරු මිතුරු”, සැප්: 06 චන්න පෙරේරාගේ “යුගත්‍රා”, සැප්: 07 මොහාන් නියාස්ගේ “ශ්‍රි වික්‍රම”, සැප්: 08 සුසිරන්ද සිල්වාගේ මිස් ජෙනිස්”. සහ සැප්: 09 උදයකාන්ත වර්ණසූරියගේ “ගින්දරි” යන චිත්‍රපට තිර ගතවනු ඇත.
ස්කෝප් සිනමා පුද්ගලික සමාගමෙහි අලෙවිකරණ සහ නිෂ්පාදක කළමනාකරුවන ජයරත්න ගලගෙදර මහතා පවසන්නේ මෙම චිත්‍රපට උළෙල සඳහා ඒ ඒ දිනවල ප්‍රදර්ශනය කෙරෙන චිත්‍රපට වල රංගනයෙහි යෙදෙන සිනමා නළු නිළියන් සියලු දෙනා ද එදින සහභාගි වන අතර ඔවුන්ගේ ප්‍රධානත්වයෙන් ඒ ඒ චිත්‍රපට ප්‍රදර්ශනය පැවැත්වෙන බවය. මේ නිසා ප්‍රේක්‍ෂක ජනතාවට ද ඔවුන් සමඟ අති සුඛෝපභෝගී සිනමාහලක් වන “ලිබර්ටි”හිදී මෙම චිත්‍රපට නැරඹීමේ දුර්ලභ අවස්ථාවක් උදාවන්නේ යයිද ගලගෙදර මහතා පවසයි.
මෙම උළෙලේ පූර්ණ මාධ්‍ය අනුග්‍රහය දෙරණ මාධ්‍ය ජාලය විසිනි. මෙම චිත්‍රපට නිර්මාණ පිළිබඳව සහ නළු නිළියන් ඇතුළු සෙසු කලා ශිල්පීන් පිළිබඳ සටහනක් ද ජයරත්න ගලගෙදර මහතා විසින් අපවෙත යොමුකර ඇති අතර, එම චිත්‍රපට පිළිබඳ තොරතුරු මෙයාකාරය.
ඒ අනුව සැප්තැම්බර් 04 වෙනිදා තිරගතවන ජයන්ත චන්ද්‍රසිරිගේ “මිදුණ විශ්වය” අප වෙත ඉදිරිපත් කරන්නේ මෙවැනි කතා පුවතකි.
රංගනය ඉතා සියුම් මානසික විද්‍යාවක් සේ සලකා ඒ ගැන ඉගැන්වීමේ යෙදෙන වරේණ්‍ය නැමැති ආචාර්යවරයාට තම පන්තියකදී සූමධ්‍යා නම් සුවිශේෂ ශිෂ්‍යාවක හමුවෙයි. අනෙක් සිසු සිසුවියන්ට වඩා ඇය තුළ වූ විශේෂත්වය වන්නේ රංගන අභ්‍යාස වලදී සමහර විටක සිදුවිය හැකි මෝහනීය තත්ත්වය ඉක්මවා ගිය වෙනස්ම මානසික තලයකට පිවිසීමට ඇයට හැකියාවක් ඇති බැවිනි. චිත්‍රපටයේ ගැටුම ආරම්භ වන්නේ මේ තත්ත්වය යටතේ අසාමාන්‍ය කාල විපරිවර්තනයකට ගොදුරුවන සූමධ්‍යා, මීට දශක පහකට පෙර එම ඉරණමට ම මුහුණ දුන් රාජිණි නම් සුප්‍රකට සිනමා තාරකාවගේ සංවේදන ප්‍රවාහිකාව බවට පත්වීමත් සමඟ ය. ඒ අනුව 1964 වසරේ රාජිණි දැන් 2020 වසරේ ජීවත්වන සූමධ්‍යාව සිය මාධ්‍ය ලෙස යොදා ගනිමින් ආචාර්ය වරේණ්‍ය වෙතින් රූපණ විද්‍යාව හදාරන්නට පටන් ගනී.
සාර්ථක සිනමා නිළියක වුවද අසාර්ථක විවාහ දිවියක් ගෙවන රාජිණී වරේණ්‍යගෙන් අධ්‍යාපනයට අමතරව ප්‍රේමයද ප්‍රාර්ථනා කරන්නීය. මෙය කාල දෙකක සහ යුග දෙකක ස්ත්‍රි පුරුෂ ප්‍රේමයකි. නමුත් එයට මහත්ම බාධාව වන්නේ අප්‍රකාශිතව වරේණ්‍යයට ප්‍රේමකළ සූමධ්‍යාට මේ ගැන සැළවිමත් සමඟය. ඒ නිසා මෙය දෘශ්‍යමාන ප්‍රේමය සහ අදෘශ්‍යමාන ප්‍රේමය අතර ගැටුමක්ද වෙයි.
අවසානයේ ඔව්හු තම ප්‍රේමය අරභයා ගැටලුවක් ඇතිකරනු ලැබුවේ දෛවය විසින් නොව කාලය විසින් බව වටහා ගනිති.
උද්දික ප්‍රේමරත්න, උදාරි වර්ණකුලසූරිය, බුද්ධික ජයරත්න, සුලක්ෂී රණතුංග, ශ්‍රියන්ත මෙන්ඩිස්, කුසුම් රේණු, දමිතා අබේරත්න, වසන්ති විට්ටච්චි, උදිත ගුණරත්න, ගාමිණි ජයලත්, දිමුතු චින්තක, ඥණාංග ගුණවර්ධන සහ ලක්‍ෂමි දමයන්ති ඇතුලු තවත් නළු නිළියන් ගණනාවක් රංඟනයෙන් සහභාගි වෙති.
මෙහි කැමරා අධ්යක්ෂණය සහ සංස්කරණය ප්‍රවීන් ජයරත්න අතින් සිදුවන අතර සංගීත අධ්යක්ෂණය නවරත්න ගමගේ ගෙනි. පියරත්න අකුරම්බොඩ කලා අධ්යක්ෂණය කරයි. “මිදුණු විශ්වය” රුවන් ජයසිංහගේ නිෂ්පාදනයකි.
කතුරු මිතුරු
ජනප්‍රිය සිනමා හා රූපවාහිනී රංගන ශිල්පියෙකු මෙන් ම ප්‍රකට චිත්‍රපට අධ්යක්ෂවරයෙකු ද වන ගිරිරාජ් කෞශල්‍ය මෙම චිත්‍රපටය අධ්යක්ෂණය කර තිබේ. පාරම්පරිකව පැවත එන බාබර් සාප්පුවක් සහ ටේලර් සාප්පුවක් පවත්වාගෙන එනු ලබන බාබර් කෙනෙකු සහ ටේලර් කෙනෙකුගේ දිවි පෙවෙත පදනම් කර ගිනිමින් ගොඩ නැඟුණු කතා පුවතක් මෙයට පදනම් වී ඇත.
බාබර් සහ ටේලර්ගේ දුව සහ පුතා විශ්ව විද්‍යාල අධ්‍යාපනය අවසන් කර ගමට පැමිණෙන්නේ රැකියා විරහිතයින් ලෙසය. ඔවුන් උසස් රැකියාවල නිරතවනු දැකීම මෙම පවුල් දෙකෙහිම වැඩිහිටියන්ගේ අභිප්‍රාය වුවත්, මොව්හු තම තමන්ගේ පියවරුන් කළ ව්‍යාපාර නවීකරණය කර පවත්වාගෙන යාමට කැප වෙති.
බාබර් සාප්පුවට සහ ටේලර් සාප්පුවට පැමිණෙන විවිධාකාර ගනුදෙනුකරුවන්ගේ චරිත මුල් කර ගනිමින් මෙය හාස්‍යොත්පාදක කර චිත්‍රපටයක් සේ ඉදිරිපත් කිරීමට අධ්‍යක්‍ෂවරයා කටයුතු කර ඇත.
අප රටෙහි ටෙලි නාට්‍ය විස්සකට අධික ප්‍රමාණයක්ද, චිත්‍රපට හයක ප්‍රමාණයක් ද නිෂ්පාදක කර ඇති අලංකුලම ෆිල්ම්ස් හත්වන නිෂ්පාදනය වන්නේ ගිරිරාජ් කෞශල්‍ය අධ්යක්ෂණය කළ “කතුරු මිතුරු” චිත්‍රපටයයි. “අලංකුලම හෝල්ඩින්ස්” ආයතනයේ අධිපතිවරයා වන බාසුරු සිරිවර්ධන මෙහි නිෂ්පාදකවරයා වෙයි.
ජයලත් මනෝරත්න, මහේන්ද්‍ර පෙරේරා, සහ ජයනී සේනානායක ඇතුළු නළු නිළියන් පිරිසක් මේ සඳහා රංගනයෙන් දායකවේ. මෙහි කැමරාකරණය රුවන් කොස්තාගෙනි. දෙවන කැමරාකරණය තුසිත අනුරාධගෙනි. සංස්කරණය අජිත් රාමනායකගෙන්ද, කලා අධ්යක්ෂණය මනෝජ් වික්‍රමසිංහගෙන්ද වන අතර සංගීතය රෝහණ විරසිංහගෙනි.
යුගාත්‍රා
ජනප්‍රිය සිනමා හා ටෙලි නාට්‍ය රංගන ශිල්පියෙකු වන චන්න පෙරේරා අධ්යක්ෂණය කළ “යුගාත්‍රා” පුනරුත්පත්තිය හා බැඳුණු කතා පුවතක් අන්තර්ගතව ඇත්තකි.
තරුණයෙකු වීමෙන් අනතුරුව නිරන්තරයෙන් එකම සිහිනයක් දැකීමේ අත් දැකීමකට මුහුණ දී සිටින විසල් තමාගේ ළඟම හිතවතියක වන අමායා හට ඒ බව පවසයි. විසල්ට දැඩි ලෙස ඇළුම් කරන අමායා එම අදහස සමච්චලයෙන් බැහැර කරයි. එහෙත් මෙම සිහිනයේ දකින සුරූපී යුවතිය කෙදිනක හෝ තමාට මුණ ගැසී ඇති බව ඔහු විශ්වාස කරයි.
මේ අතර දිනක් යම්කිසි රාජකාරී කටයුත්තක් සඳහා සිය ජීප් රථයෙන් කඳුකරයට ගමන් ගන්නා විසල්ට කාර්මික දෝෂයක් හේතුකොට ගෙන, සිය රථය මඟ නතර කර දමා රාත්‍රිය ගත කිරීම සඳහා කඳු මුදුනක වූ හුදෙකලා බංගලාවක රාත්‍රිය ගත කිරීමට සිදුවෙයි.
බංගලාවේ හිමිකාරිය වන මහලු කාන්තාව හොඳින් දැක පුරුදු අයෙකු මෙන් විසල්ට එහි නවාතැන් ලබාදෙන අතර, තමා සිහිනයෙන් දකින යුවතියගේ ඡායාරූප එහි තැනින් තැන තබා ඇති අයුරු දකියි. ඒ ගැන විමසීමේදී මහලු කාන්තාව පවසන්නේ ඒ තම දියණිය බවත්, ඇයද තමා සමඟ මෙම බංගලාවේ වාසය කරන බවත් ය. ඉන් අනතුරුව එම තරුණිය හමුවන විසල් ඇය හා පෙමින් බැඳී ජීවිතයේ සියලු කටයුතු පසෙකලා එහිම නැවතිමට තීරණය කරයි.
මෙහි තිර රචනය සහ අධ්යක්ෂණය චන්න පෙරේරාගෙන් වන අතර, ඉසුරු විජේසිංහ, ජානක එදිරිසූරිය ශ්‍රියානි සේනානායක, වසන්ත පෙරේරා සහ ආචාර්ය ජයන්ත ධර්මදාස මෙහි නිෂ්පාදකවරු වෙති.
මාෂි සිරිවර්ධන, අසංකිද සිල්වා, නදිකා ගුණසේකර, සනත් ගුණතිලක, ලක්ෂමන් මෙන්ඩිස් ඇතුළු නළු නිළියන් චරිත නිරූපණය කරන මෙහි කැමරාව බුද්ධික මංගලගෙන් වන අතර, සංගීත අධ්යක්ෂණය දිනේෂ් සුබසිංහගෙනි. අජිත් රාමනායක සංස්කරණයෙන් ද, ලෙස්ලි සිරිවර්ධන කලා අධ්යක්ෂණයෙන් ද සම්බන්ධ වෙති.
ශ්‍රී වික්‍රම
ක්‍රි: වර්ෂ 1739 දී සිට කන්ද උඩරට රාජධානියට හිමිකම් කියූ නායක්කාර් වංශිකයින්ට එරෙහිව උඩරට සිංහල ප්‍රභූන් සහ රදළයින් විසින් දියත් කරනු ලැබූ දේශපාලන කුමන්ත්‍රණ පිළිබඳ සිදුවීම් පෙළක් මෙතුළින් ඉදිරිපත් වෙයි.
ජනප්‍රිය නායක්කාර් වංශික රජෙකු වූ ශ්‍රි වික්‍රම රාජසිංහයන් ඇහැළේපොලගේ දරුපවුල කෲර ලෙස ඝාතනය වන තැනට කටයුතු සලස්වා ඉංග්‍රීසීන් ලවා රජු බලයෙන් පහ කරවීමත්, එතුළින් රදළ වංශිකයින් මුදුන් පත්කර ගන්නට තැනූ අභිප්‍රායයන් ඉටු නොවූ ආකාරයත් ශ්‍රි වික්‍රම චිත්‍රපටය තුළි අන්තර්ගත වේ.
මොහාන් නියාස්ගේ අධ්යක්ෂණයෙන් ද, ගිහාන් ගොඩකන්දගේ නිෂ්පාදන දායකත්වයෙන් ද ඉදිරිපත් වන ශ්‍රි වික්‍රම අජිත් ධර්මසූරියගේ තිර රචනයකි.
සජිත් වීරප්පෙරුම කැමරා අධ්යක්ෂණයෙන් ද අනුර බණ්ඩාර සංස්කරණයෙන් ද, මෙම චිත්‍රපටය සඳහා සහය වෙති. මෙහි සංගීත නිර්මාණය ෆර්හාන් ශාන් ගෙනි.
“ශ්‍රි වික්‍රම” චිත්‍රපටය සඳහා ශ්‍රියන්ත මෙන්ඩිස්, අකිල ධනුද්ධර, චුලක්ෂ රණතුංග, ශ්‍යාම් ප්‍රනාන්දු, රෝෂාන් පිලපිටිය, බුද්ධදාස විතානච්චි සහ පාලිත සිල්වා සමඟ තවත් ජනප්‍රිය නළු නළියන් රැසක් රංගනයෙන් සහභාගී වෙති.
මිස් ජෙනිස්
සාර්ථක ටෙලි නිර්මාණ ගණනාවක් රූපවාහිනිය මාධ්‍යයට එකතු කළ දක්ෂ අධ්යක්ෂවරයෙකු වන සුසිරින් ද සිල්වා විසින් තිර රචනය කොට අධ්යක්ෂණය කළ “මිස් ජෙනිස්” චිත්‍රපටය නව ආරක කතා පුවතක් සහිත නිර්මාණයකි.
පරිගණක වෙළඳ ආයතනයක කළමනාකරුවෙකු ලෙස සේවය කළ ලියොන් නැමැති මධ්‍යම පන්තිකයා තරුණ දරුවන් දෙදෙනෙකුගේ පියකු වන අතර, ආයතනයට පරිබාහිර පුද්ගලයෙකු වන තම මිතුරෙකු සමඟ සිදු කරන වංචාවක් නිසා රැකියාවෙන් නෙරපනු ලබයි. එසේ නෙරපීමෙන් නොනවතින ආයතනයේ කළමණාකාරිත්වය මුහුණ පොත හරහා ඉතා දැඩි ලෙස පහර දෙමින් ඔහුට කිසි තැනක රැකියාවක් ලබාගත නොහැකි තත්ත්වයට පත් කරයි.
මේ අවස්ථාවේ ඔහුට පිහිට වන මිතුරා දක්ෂ වේෂ නිරූපණ ශිල්පිණියක වන තම බිරිඳ ලවා මෙම ලියෙන් නැමැත්තා රූමත් ස්ත්‍රියක ලෙස වෙස්වලා ගැනීමට සලස්වයි. සිනමා වෘතාන්තය ගලා යන්නේ මෙසේ ස්ත්‍රියක් ලෙස වෙස්වලා ගැනීම හේතු කොට ගෙන, ලියොන් නැමැත්තාට මුහුණ දෙන්නට සිදුවන අනෙක විධ ගැටලු මුල්කර ගනිමිනි.
දක්ෂ රංගනවේදියෙකු වූ අභාවප්‍රප්ත ජයලත් මනෝරත්න “මිස් ජෙනි්ස්” චිත්‍රපටයේ ජෙනිස් නම් කාන්තාව ලෙස සුවිශේෂී රංගනයක යෙදෙන අතර, සෙසු චරිත නිරූපණ දුලීකා මාරපන, රොෂාන් රණවන, උදාරි පෙරේරා, ජයලාල් රෝහණ, ගිරිරාජ් කෞශල්‍ය, ඇන්ජිලෝ බාන්ස්, ඕෂධී හිමාෂා, මාධනී මල්වත්ත සහ කුමාර තිරමාදුර ඇතුළු නළු නිළියන්ගේ සහභාගීත්වයෙන් සිදුවේ.
මෙම චිත්‍රපටය සඳහා අයෙෂ්මන්ත හෙට්ටිආරච්චි කැමරා අධ්යක්ෂණයෙන් ද, මේඝ කොළඹගේ සංස්කරණයෙන් ද, ලකී විජේවර්ධන කලා අධ්යක්ෂණයෙන් ද, සම්බන්ධ වෙති.“මිස් ජෙනිස්” සංගීත අධ්යක්ෂණය ලක්ෂ්මන් විජේසේකරගෙනි.
ගින්දරි-3
ජනප්‍රිය චිත්‍රපට අධ්‍යක්ෂ උදයකාන්ත වර්ණසූරිය කතාව දෙබස් සහ තිර රචනය ලියා අධ්යක්ෂණය කරන “ගින්දරී”-3 ඔහුගේ ම නිෂ්පාදනයක් ද වේ.
මීට ප්‍රථම ඔහු විසින් ම නිර්මාණය කරන ලද “ගින්දරී-1 සහ ගින්දරී-2 යන චිත්‍රපටවල තුන්වන නිර්මාණය ලෙස එළිදකින මෙහිදී බොහෝ දුරට රඟපානු ලබන්නේද එම නළු නිළියන්ම වේ. නමුත් මීට ප්‍රථම තිරයට ආ “ගින්දරී” චිත්‍රපට වලට වඩා සුවිශේෂී සිදුවීම් රැසක් ඇතුළත් මෙම චිත්‍රපටය සඳහා මිනිසුන් සහ යක්ෂයින් අතර මෙන් ම දෙවිවරුන් සමඟ වූ සටන් ද ඇතුළත්ය. නුෂ්‍ය වේෂයෙන් සිටින අමනුෂ්‍ය ගැහැනියක වන ටිකිරිද ඇය හා විවාහ වී සිටින මනුෂ්‍යයකු වන බන්ටි ද නිසා ඔවුනට උපන් පුත්‍රයා සුවිශේෂී හැකියාවන් සහිත තැනැත්තෙකු වෙයි. සියලු ගැටලු ඇරඹෙන්නේ “සුපිරි” නම් මෙම දරුවා අමනුෂ්‍ය ලෝකයට රැගෙන යාමට පැමිණෙන යක්ෂණියන් තිදෙනෙකු හේතු කොට ගෙනය.
පබෝධා සන්දීපනී, මහේන්ද්‍ර පෙරේරා, රොඩ්නි වර්ණකුල, ටිශෝන් වැන්හොෆ්, ශ්‍රිනාත් මද්දුමගේ, සමන්ත පෙරේරා, තුලක්ෂි රණතුංග, ටීනා ෂනෙල්, චංචලා වර්ණසූරිය සහ තරින්දි ප්‍රනාන්දු ආදී නළු නිළියන් රැසක් මෙහි චරිත නිරූපණය කරති.
කැමරා අධ්යක්ෂණය කේ.ඩී. දයානන්ද ගෙන් වන අතර, සංස්කරණය හා ශබ්ද සැලැසුම් වලින් ප්‍රවීන් ජයරත්න ද කලා අධ්යක්ෂණයෙන් අරුණ ඩයස් ද සම්බන්ධ වන මෙහි සංගීතය ආනන්ද පෙරේරාගෙනි.
