හයවන පරාක්‍රමබාහු රාජ සමයේ එතුමාගේ සෙන්පතියකු වූ සෙම්බගබ්පෙරුමාල් හෙවත් සපුමල් කුමාරයා විසින් මෙම දේවාලය ඉදිකරන්නට ඇතැයි විශ්වාස කැරේ. අතීත කතා අනුව කියැවෙන්නේ යාපා පටුන ජය ගැනීමට යන ගමනේදී සපුමල් කුමාරයා විසින් මෙම ස්ථානයේ අඹ වනයක් දැක කිහිප දිනක් නතර වී විවේක ගත් බවක් කියැවේ. ආපසු ගමන යන්නට පිටත් වී යාපා පටුණ ජයගෙන පැමිණිය හොත් මෙම ස්ථානයේ දෙවොලක් ඉදිකරන බවට සපත වී තිබේ. කෙසේ හෝ යුද්ධය ජය ගැනීමෙන් පසු සපුමල් කුමාරයා විසින් මේ ස්ථානයේ කතරගම දෙවියන් උදෙසා දොවොලක් ඉදිකර තිබේ. එකල එම ස්ථානයේ තිබූ ඉපැරණි බෝධීන් වහන්සේ මෙන්ම තවමත් දක්නට ලැබේ.
මේ කතාව හා කියැවෙන කතා බොහෝය. මාම්පේ ගණේවත්ත දේවාලය මෙන්ම අවට ගම් බිම් හා සම්බන්ධ කතා ද වේ.
අනාදිමත් කලක සිට ජනයා විසින් පුද පුජා පවත්වන ලද දේවාලය එක් කාලයක වල්බිහි වී තිබිණි. එසේ තිබූ දෙවොල යළි එළිපෙහෙළි කර පුද බිමක් බවට කර ඇත්තේ එවකට සංස්කෘතික උප ඇමතිවරයකුව සිටි සෝමවීර චන්ද්‍රසිරි මහතාය. එතුමා විසින් මෙම ස්ථානය යළි නගා සිටුවමින් පෙරහැර පැවැත්වීම ආරම්භ කර ඇත්තේ 1949 වසරේදීය. එතැන් පටන් මේ දක්වාම දානපතියන්ගේ හා ප්‍රදේශවාසීන්ගේ උදව් උපකාර ඇතිව ගනේවත්ත දේවාලයේ ඇසළ පෙරහර මංගල්‍ය උත්කර්ෂවත් අයුරින් පැවැත්වේ. මෙවරද පෙරහර පැවැත්වෙන අතර අවසන් රන්දෝලි මහ පෙරහර 23 දා පිළියන්දල නගරය ඔස්සේ විථී සංචාරය කරනු ඇත. මෙම ඓතිහාසික ගනේවත්ත දේවාලයේ ප්‍රධාන කපු මහතා වන්නේ මහී සුදේශ් වැලිවත්තය.
