ශ්‍රී ලංකා නිදහස් පක්ෂයට නව නායකත්වයක් අවශ්‍ය නම් තමන් ඒ සඳහා ඉදිරිපත් වීමට සූදානම් බව කළුතර දිස්ත්‍රික් පාර්ලිමේන්තු මන්ත්‍රී කුමාර වෙල්ගම මහතා සිළුමිණ ට පැවසීය. කෙසේ වුවත් ශ්‍රී ලංකා නිදහස් පක්ෂය යළි ප්‍රතිසංවිධානය කිරීමේ කටයුත්තට තමන් මුල පුරන බවත් ඉදිරියේදී ඒ සම්බන්ධයෙන් අවශ්‍ය පියවර ගන්නා බවත් මන්ත්‍රීවරයා තවදුරටත් සඳහන් කළේය.
සිළුමිණ කළ විමසීමකදී අදහස් දැක්වූ මන්ත්‍රීවරයා ප්‍රකාශ කළේ තමන් කිසිදු විටෙක පොහොට්ටුවට එක් වීමට හෝ සජිත් ප්‍රේමදාස මහතාට සහය ලබා දීමට බලාපොරොත්තුවක් නොමැති බවයි. ඒ වෙනුවට ශ්‍රී ලංකා නිදහස් පක්ෂය යළි ප්‍රතිසංවිධානය කිරීමට පියවර ගන්නා බවත් අවශ්‍ය නම් ඊට නායකත්වය දීමටද තමන් සූදානම් බවත් ඔහු පැවසීය. මේ පිළිබඳව ජනාධිපති මෛත්‍රීපාල සිරිසේන මහතා සමඟ මෙන්ම විදෙස්ගතව සිට ලබන සතියේ මෙරටට පැමිණීමට නියමිත හිටපු ජනාධිපතිනි චන්ද්‍රිකා බණ්ඩාරනායක මහත්මිය සමඟද සාකච්ඡා කිරීමට බලාපොරොත්තු වන බව වෙල්ගම මහතා තවදුරටත් සඳහන් කළේය.
