ඡන්දය සලකුණු කිරීමේදී ඡන්ද පත්‍රිකාවේ යම් වැරදීමක් සිදු වුව හොත් එය නිවැරදි කිරීමට ඇඟිල්ලෙන් මකන්නට හෝ කුරුටුගාන්නට නොයන ලෙසත්, ඒ ඡන්ද පත්‍රිකාව වෙනුවට වෙනත් ඡන්ද පත්‍රිකාවක් ලබාගැනීමට හැකියාව තිබෙන බවත් මැතිවරණ කොමිසමේ සභාපති මහින්ද දේශප්‍රිය මහතා සඳහන් කරයි.
ඇඟිල්ලෙන් මැකීමට හෝ කුරුටු ගෑමෙන් සිදු වන්නේ ඒ ඡන්දය අවලංගු ඡන්දයක් බවට පත් වීම බව ඔහු පෙන්වා දෙයි. ඡන්දය සලකුණු කිරීමට ඡන්ද මධ්‍යස්ථානය වෙත යන විට විට තමන් ඡන්දය දෙන්නේ කාටදැයි පැහැදිලි අවබෝධයකින් යන්නේ නම් වැරදීම් සිදු නොවන බවද ඔහු සඳහන් කරයි. කෙසේ වෙතත් වැරදුණු ඡන්ද පත්‍රිකාව වෙනුවට අලුත් පත්‍රිකාවක් නිකුත් කරන්නේ වැරදුණු පත්‍රිකාව ඡන්ද පොළ නිලධාරියා විසින් යම් නීති රාමුවකට අනුව භාර ගැනීමෙන් අනතුරුව වන බැවින් කිසිදු අක්‍රමිකතාවක් සිදු වීමේ අවකාශයක් නැති බව ඔහු වැඩිදුරටත් පැවැසීය.
