සනෝජා බිබිලේට තනිකම් දෝෂයක්
අපේ රටේ ඉන්න ජනප්‍රිය රංගන ශිල්පිනියකු වන සනෝජා බිබිලේ මේ දවස්වල භාර දූර කාර්යකට අතගහලා. ඒ තමයි චිත්‍රපටි සංස්ථාවේ අධ්‍යක්ෂකවරියක් ලෙස චිත්‍රපටි කර්මාන්තය ගොඩ ගන්න පටන් අරන් තියෙන එක. මේ ගැන අහන්න ඇයට කතා කළා.
අධ්‍යක්ෂතුමිය කොහොමද වැඩ කටයුතු?.
‘‘හොඳින් කරගෙන යනවා සංස්ථාවේ සභාපතිතුමා වගේම අධ්‍යක්ෂක මණ්ඩලය එක් වෙලා අපේ චිත්‍රපටි කර්මාන්තය දියුණු කරන්න විශේෂ වැඩසටහන් රැසක් කරගෙන යනවා. එතකොට කලා කටයුතු කොහොම ද ? භාග්‍ය රත්නායක කියලා කැම්පස් එකෙන් අවුට් වෙච්ච අලුත්ම අධ්‍යක්ෂවරයකුගේ මෙගා ටෙලි නාට්‍යයක වැඩ කරමින් ඉන්නවා. මෙය සම්භාව්‍ය කෘතියක්. ගමක කාන්තාවකට තනිකම් දෝෂයක් වැළදිලා. එහිදි වෙන දේවල් තමයි මේ කතාවේ මගේ චරිතයට තිබෙන්නේ. කීර්ති බණ්ඩාරගේ අලුත් චිත්‍රපටයකටත් කතා කරලා තිබෙනවා. හැබැයි කවදා රූගත කිරීම් කරාවිද දන්නේ නැහැ. ඊට අමතරව මගේ රැකියාව කරගෙන ඉන්නවා.‘‘
දුලීකා මාරපන සුපර්ණා වෙයි
ලෝරන්ස්ගේ මනමාලි යුරෝපා සංචාර‍යකට සූදානම්. හැබැයි ඒ ගමනෙන් පස්සේ එම වේදිකා නාට්‍ය නවත්වන්න තීරණය කරලා තියෙනවා කියලා අපට ආරංචියක් ලැබුණා. මේ ගැන ඇත්ත දැනගන්න අපි දුලීකා මාරපනට කතා කළා.
ඇත්තද ඒ කතාව.
‘‘ ඔව් දර්ශන වාර ගොඩාක් පෙන්වල තියෙන නිසා යුරෝපා සංචාරයෙන් පස්සේ බොහෝ දුරට නවත්වන්න තමයි තීරණය කරලා තිබෙන්නේ. ඒ වගේම මම රඟපාන අලුත්ම චිත්‍රපටය ‘සුපර්ණා‘ විදේශීය චිත්‍රපට උළෙලවල් කිහිපයක් නියෝජනය කරන්න සූදානමින් ඉන්නවා. එහි ප්‍රධාන චරිතය වන සුපර්ණාගේ චරිතය මමයි කරන්නේ. ඒ වගේම අපේ රටේ දක්ෂ, ප්‍රවීණ වගේම තරුණ පරපුරේ නළු නිළියන් බොහෝ දෙනෙක් මෙහි රංගනයේ නියැළෙනවා. විශේෂයෙන් මෙහි කතා වෙන්නේ පරිසරය ආරක්ෂා කර ගැනීම ගැන. මේ වෙනකොට අපේ පරිසරය වගේම උරුමයන් බොහෝමයක් නැති වෙමින් යනවා. මේ තත්ත්වය වලක්වා ගන්න උත්සාහ ගැනීමක් තමයි මේ චිත්‍රපටයේ මූලික අරමුණ වෙලා තිබෙන්නේ. මෙහි රඟපාන සෑම කෙනාගෙම චරිත සුවිශේෂයි. විදේශ චිත්‍රපට උළෙලවලින් පසු අපේ රටේ පෙන්වන්නත් සියල්ල සූදානම් කර තිබෙනවා. මම හිතනවා මෙය සෑම කෙනාගෙම අවධානය දිනාගත් චිත්‍රපටයක් වේවි කියලා.‘‘
නයෝමි පොළොවේ පය ගහලා ඇවිදින කෙනෙක් ලු
නයෝමි තක්ෂිලා කියන්නේ වත්මන් පරපුරේ සිටින ජනප්‍රිය රංගන ශිල්පිනියක්. වීර පබළු, උත්තම පුරුෂ, සඳ එළිය කියන නාට්‍යවලින් මේ දවස්වල ඇය දැකගන්න පුළුවන්. හැබැයි පසුගිය කාලයේ ගීත රූප රචනාවල දැක්කත් දැන් වැඩිපුර දකින්නේ නැහැ. ඒ නිසා මොනවද මේ දවස්වල කරන්නේ කියලා දැනගන්න අපි නයෝමිට කතා කළා.
‘‘මම රගපෑ නාට්‍ය කිහිපයක්ම මේ දවස්වල විකාශනය වෙනවා. නිදහසේ පියා චිත්‍රපටයට රංගන දායකත්වය ලබාදුන්නා. වේදිකා නාට්‍යවලටත් සම්බන්ධ වෙලා වැඩ කරනවා. එතකොට රූප රචනාවලින් ඈත් වුණාද ? අනේ නැහැ. මේ ටිකේ වැඩ ටිකක් වැඩි වෙලා තිබුණා. ඒ නිසයි රූප රචනා වලට සම්බන්ධ වෙන්න බැරි වුණේ. ඒත් ඉඩක් ලැබුණු විගස ඒ දේවල්වලට නැවත සම්බන්ධ වෙනවා. ඒ වගේම නිර්මාණ කිහිපයකටම ආරාධනා ලැබිලා තිබෙනවා. එම නිසා ඉදිරියේදී විවිධ චරිතවලින් මාව රසිකයන්ට දැකගන්න ලැබේවි.
එතකොට
නයෝමි මොන වගේ කෙනෙක් ද? පොළොවේ පය ගහලා ඇවිදන සරල කෙනෙක්.
වසර තිහක් පැරැණි මරණයක් ගැන හොයන ලාල් වීරසිංහ
ලාල් වීරසිංහ නම් අපේ ප්‍රවීණ රංගන ශීල්පියා අවුරුදු තිහකට කලින් වුණ මරණයක් ගැන හොයන්න පටන් ගෙන කියලා ආරංචියක් ලැබුණා. නළු කමෙන් ඉවත් වෙලා මේ වගේ වැඩකට අතගැහුවේ ඇයි කියල හොයන්න අපි ලාල්ට කතා කළා.
මොකද මේ පරණ මිනී මැරුමක් ගැන හොයනවා කියන්නේ ? අඳුරන කෙනෙක්ගෙද ?
‘‘ඔව්, ඔව්, චන්න පෙරේරා අධ්‍යක්ෂණය කරන පවත්මා ටෙලි නාට්‍යයේ රහස් පරීක්ෂකවරයකුගේ චරිතයක් ලැබුණා. කාලෙකට පස්සේ ලැබුණ හොඳ චරිතයක්. අපේ රටේ ප්‍රවීණ වගේම වත්මන් පරපුරේ රංගන ශිල්පීන් සහ ශිල්පිනියෝ රැසක් මෙහි රංගනයේ නියැළෙනවා. ඒ වගේම තවත් සුබ ආරංචියක් අහන්න ලැබුණා. ඒ චිත්‍රපටි සංස්ථාව යටතට සියලුම මණ්ඩල පවරා ගන්න යනවා කියලා. ඇත්තටම අපි පසුගිය කාලේ සංස්ථාව පැත්ත පළාතට ගියේ නැහැ. හැබැයි අලුත් සභාපතිවරයා නීතිඥයෙක්. එතුමා නීතිය දන්න නිසා හොඳ වැඩක් කරන්න යන්නේ. ඒ දේ කළොත් යළිත් චිත්‍රපටි කර්මාන්තයට හොඳ කාලයක් උදාවේවි.‘‘
ඒ කියන්නේ කළකිරීමෙන්ද ඉන්නේ? ‘‘මම විතරක් නෙවෙයි කලාකාරයෝ බොහෝ දෙනෙක් කලකිරීමෙන් ඉන්නේ. චිත්‍රපටයක් කරලා පාඩු ලබන්න කවුරුවත් කැමැති නැහැ නේ. අපි නම් රඟපාල නමක් හදාගෙන ඉන්නවා. අලුතෙන් එන අයට දෙයියන්ගේ පිහිටයි මෙහෙම ගියොත්. ඒ නිසා අලුත් සභාපතිතුමා යමක් කරාවි කියලා මම හිතනවා. මීට අවුරුදු දෙකකට උඩදි චිත්‍රපටියක් කළා. ඉදිරියෙදිත් චිත්‍රපටියක් කරන්න බලාපොරොත්තු වෙනවා. ඒ වගේම මගේම ව්‍යාපාරවල වැඩත් කරගෙන යනවා.‘‘
