රනිල භෝගවල ඇති ප්‍රතිපෝෂක කෑම වේලේ පෝෂණ කොටස් ශරීරයට උරාගැනීම වළක්වනවා
පැරැණියන් එම භෝග ආහාරයට ගත්තේ සූප විද්‍යාත්මකව ප්‍රතිපෝෂක ඉවත් කරලා
උයන්නන් වාලෙ උයලා පරිප්පු කෑමෙන් පෝෂණ ගැටලු රැසක්
පරිප්පු යනු ලංකාවේ ළමා මහලු කොයි කාටත් නැතුවම බැරි කෑමකි. එක දවසක්වත් පරිප්පු නොකන ලක්වැසියෙකු හොයා ගන්න බැරි තරමටමට පරිප්පු ලාංකිකයන්ගේ ආහාර වේල තුළ ස්ථාපිත වී ඇත. පරිප්පු සාමාන්‍යයෙන් පෝෂණීය, විශේෂයෙන් ප්‍රෝටීන් බහුල කෑමක් ලෙස පිළිගැනේ. රතු පරිප්පුවල ෆෝලික් අම්ලය, විටමින් බී 9 වගේම යකඩත් සරුවට තිබේ. ඊට අමතරව කැල්සියම්, සින්ක්, පොස්පරස් ස්වල්ප වශයෙන් ඇත.
ඉන්දියාවේ හැදෙන පරිප්පු නිසා ඉන්දියාව පෝසත් වන නමුත් ලංකාවේ අපේ පෝෂණය පෝසත් වෙනවාද යන කාරණාව ගැන දෙවරක් හිතන්නට වී තිබේ. ඒ පරිප්පුවල ගැටලුවක් නොව, අප පරිප්පු ආහාරයට ගන්නා ආකාරයේ අවුල් සහගත ස්වරූපය නිසාය. පරිප්පු පමණක් නොව, මුං, සෝයා, කඩල වැනි ඇට වර්ගත් ආහාරයට සකස් කරගන්නා ක්‍රමයේ බරපතළ ගැටලුවක් තිබේ. 
එයට හේතුව පරිප්පු, මෑ, මුං ඇට, කවුපි, කඩල, බෝංචි, සෝයා බෝංචි, කොල්ලු වැනි ආහාර වර්ගවල ස්වභාවිකවම ඇති ශාක පදාර්ථ වර්ගයකි.
එම ශාක පදාර්ථ විද්‍යාත්මකව ප්‍රතිපෝෂක (Antinutrients) ලෙස හැඳින්වේ. ප්‍රතිපෝෂක යනු අප ගන්නා ආහාරවල ඇති අත්‍යවශ්‍ය පෝෂ්‍ය පදාර්ථ අවශෝෂණය කර ගැනීමට ශරීරයට ඇති හැකියාව අඩු කරන ශාක සංයෝගයන්ය.
ඒවා ශාකයේ ආරක්ෂාවට ඇති ස්වභාවික සංඝටක වේ.
පයිටේට්, ටැනින්ස්, ලෙක්ටින්ස්, ප්‍රෝටීස් ඉන්හිබිටර්ස් (Phytate (phytic acid), Tannins, Lectins, Protease inhibitors) නම් වූ ඒ ප්‍රතිපෝෂක සංඝටක බහුලව ඇත්තේ රනිල කුලයේ ඇට වර්ගවලය. එම ප්‍රතිපෝෂක නිසා අප ගන්නා ආහාරවල ඇති ප්‍රෝටීන, යකඩ, කැල්සියම්, සින්ක් , අයඩීන් වැනි ක්ෂ්‍රද්‍ර පෝෂක වර්ග අවශෝෂණය වැළැක්වීම හෝ නිසියාකාරව අවශෝෂණය කරගැනීමට බාධා පැමිණවීම සිදු වන බව විද්‍යාත්මකව තහවුරු කර ඇත.
අවුරුදු ලක්ෂ ගණනාවක් තිස්සේ මිනිසුන් රනිල භෝග ආහාරයට ගත්තේ නැත.
රනිල කුලයේ ශාක නිෂ්පාදන මිනිසුන් ස්වකීය ආහාරයට එක් කරගන්නේ දැනට අවුරුදු දස දහසකට පෙරය.
එනම් කෘෂිකාර්මික යුගයේදීය. නමුත් කල් යත්ම එම භෝග රසවත්, ගුණවත් නමුත් එම භෝග අාහාර ලෙස ගැනීමේ යම් ගැටලුවක් ඇති බව මිනිස්සු තේරුම් ගත්හ. එහි ප්‍රතිඵලයක් ලෙස එම අහාර භෝගවල ඇති ප්‍රතිපෝෂකවල බලපෑම අඩු කරගැනීම සඳහා සූපවේදීමය ශිල්ප ක්‍රම අත්හදා බැලූහ. එහි යහපත් ප්‍රතිඵල අත් කර ගත්හ.
ප්‍රතිපෝෂක ඉවත් කර ගන්නා ආකාරය.
පැය ගණනාවක්
1. රනිල ඇට වර්ග දියේ පොඟවා තැබීම.
2.■පැල වෙන්න දැමීම
3. වැඩි වේලාවක් පිසගැනීම
4. ක්ෂුද්‍ර ජීවීමය පැසවීමේ ක්‍රියාවලියට
ලක් කිරීම,
(සෝයාවලින් සකස් කරන සෝස්, ටොෆු (tofu) , සුෆූ (Sufu) අච්චාරු වැනි ආහාර වර්ග )
ඉහත සූපවිද්‍යාත්මක ක්‍රම මඟින් හානිකර ප්‍රතිපෝෂක නිෂේධනය වීම හෝ අඩු වීම සිදු වන බව විද්‍යාත්මකව සොයාගෙන තිබේ.
දැනට අවුරුදු තිහ හතළිහකට පෙර ලංකාවේ මිනිස්සු පරිප්පු මෙතරම් පරිභෝජනය නොකළහ. ඒ වකවානුවේ ලක්වැසියන්ගේ ජනප්‍රියම කෑම වී තිබුණේ මුං ඇට, කවුපි, කොල්ලු වැනි ධාන්‍ය වර්ගය. ඔවුහු ඒවා පිසීමට පෙර පැය ගණනාවක් වතුරේ පෙගෙන්න හැරියහ. බොහෝ විට රැයක් එළි වන තුරු තැබූහ. උයන්න ගියත් පැය භාගයක් විතර පිසගත්හ. එයින් රනිල පවුලේ ඇට වර්ගවල ඇති ප්‍රතිපෝෂක විනාශ වීම හෝ ඒවායේ බලපෑම අවම විය. දැන් බොහෝ දෙනා මේ උපක්‍රම භාවිත නොකරති.
සෝයා ඇට, කඩල, මුං ඇට, පරිප්පු අමුවෙන්ම අඹරා කෑමවලට යොදාගන්නා ආකාරය දක්නට ලැබේ. ධාන්‍යමය ආහාර නමින් අර පෝෂ, මේ පෝෂ ලෙස නම් කළ ආහාර වර්ග, ටීවීපී, සීරියල් වර්ග මහා පරිමාණයෙන් වාණිජව නිෂ්පාදනය වෙමින් ඇත. ඒවා හඳුන්වන්නේ ආශ්චර්යවත් පෝෂණීය ආහාර ලෙසය.
ඒ වාණිජමය පම්පෝරිය කෙරෙහි විශ්වාසය තබා අපි ඒවා ගිල දමමින් සිටිමු. එහෙත් ඒ ආකාරයෙන් සැකසුණු රනිල ඇට වර්ගවලින් සකස් කළ ආහාරවල ඇතැයි කියැවෙන පෝෂ්‍ය පදාර්ථ නියමාකාරයෙන් ශරීරයට උරාගන්නේ නැත. එමෙන්ම අප ගන්නා අනෙකුත් ආහාරවල ඇති පෝෂ්‍ය පදාර්ථත් උරාගැනීමට ඉන් බාධා පැමිණවිය හැකිය. එබැවින් අප බලාපොරොත්තු වෙන පෝෂණය ශරීරයට නොලැබෙන්නට පුළුවන.
සාමාන්‍යයෙන් එළවළු, පලතුරු, මස්, මාළු, බිත්තර සහ හිතකර තෙල්වලින් සුසැදි සමබල ආහාර වේලක් ලබාගන්නා පුද්ගලයෙකුට එම ප්‍රතිපෝෂවලින් බරපතළ හානියක් වන්නේ නැත. ඒත් මන්දපෝෂණයෙන් පෙළෙන අය, ගර්භිණී මවුවරුන්, කුඩා දරුවන් ඒ වගේම ආහාර වේල තනිකරම ධාන්‍ය හා රනිල කුලයට අයත් ආහාර මත පදනම් කරගත් නිර්මාංසාහාරි පුද්ගලයන් අතර එය ගැටලුවක් වීමට පුළුවන.
කෙසේ වෙතත් ප්‍රතිපෝෂක ඉවත් කරගැනීම සඳහා පැරැණියන්ගේ සුපවේදීය ක්‍රම ශිල්ප නැවත අපගේ කුස්සිවලට ආදේශ කරගැනීම වරදක් නැත.
මක්නිසාද යත් යුරෝපා ජාතීන් මොන තරම් කාර්ය බහුල වුවද තවමත් මුං ඇට ආහාරයට ගන්නේ පැළ කිරීමෙන් පසුය. එසේම සෝයා බහුලව ආහාරයට ගන්නා චීනය, ජපානය, කොරියාව වැනි රටවල්වල ජනතාව පැසවීමේ ක්‍රියාවලියට ලක් කළ සෝයා ආහාර හැර වෙනත් සෝයා නිෂ්පාදන ආහාරයට ගැනීම සිදු නොකරන තරම්ය.
පරිප්පු ගැන කතා කරන්නේ නම් එහි පොත්ත ඉවත් කර ඇති නිසා, ප්‍රතිපෝෂක ඉවත් කරගැනීමට වැඩි කාලයක් පොඟවා තැබි යුතු නැත. පරිප්පු දෙතුන් වතාවක් ඉතා තදින් සෝදන්න.
ඒ ජලය ඉවත් කරන්න. පිසීමට පෙර කාමර උෂ්ණත්වයේ පැය තුන හතරක් පොඟවා ගන්න. පොඟවන දියරය ඉවතලන්න. එමඟින් පරිප්පුවල ඇති ප්‍රතිපෝෂක සැලකිය යුතු මට්ටමකින් අඩු කරගත හැකිය. පරිප්පු ආහාරයට ගන්නා විට පරිප්පු ගොඩක් නොකෑමටත්, පරිප්පු සමඟ එළවුළු, පලතුරු, මස්, මාළු, කරවල හෝ හාල් මැස්සන් සහ හිතකර තෙල් වර්ගත් ආහාරයට එකතු කරගැනීමට වග බලා ගැනීමත් ඉතා වැදගත්ය. එසේ නැතිව පරිප්පුයි බතුයි හෝ පරිප්පුයි පානුයි කෑම කිසිසේත් නුවණට හුරු නැත.
