රටක් ලෙස අප දැන් නිෂ්පාදන ක්ෂේත්රය තුළ ඉදිරියට යෑම ආරම්භ කර තිබේ. එක්තරා කලෙක ඉදිකට්ටක්වත් නිෂ්පාදනය කිරීමටවත් හැකියාවක් නැතැයි කියවුණද හැමදේම පිටරටින් එනතුරු දත නියව නියවා බලා ඉන්නේ නැතුව දැන් අප විවිධ නව නිෂ්පාදන හඳුන්වා දෙන රටක් ලෙස ලොව පිළිගැනීමට ලක්ව තිබේ.
මේ වන විට බෝට්ටු නිෂ්පාදන ක්ෂේත්රය තුළද අපි පුරෝගාමී ඉදිරි සලකුණක් තබා ඇත්තෙමු. නාවුක හා ධීවර බෝට්ටු මේ වන විට හරි හරියට මෙරට තුළ නිෂ්පාදනය වන අතර ඉන් වැඩි හරියක් Made in Sri lanka ලේබලය යටතේ විදෙස් රටවලට අපනයනය කිරීමට හැකියාව ලැබී තිබේ.
බෝට්ටු නිෂ්පාදන ක්ෂේත්රය තුළ වර්තමානයේ සිදුවී ඇති ප්රගතිය පිළිබඳව තොරතුරු සොයා බැලීමට අපි තීරණය කළෙමු. එහිදී ඒ පිළිබඳව සාකච්ඡා කිරීමට සුදුසුම පුද්ගලයා අපට මුණ ගැසුණු අතර ඔහු “බෝට්ටු නිෂ්පාදන තාක්ෂණය දියුණු කිරීමේ ආයතනයේ” කළමනාකාර අධ්යක්ෂවරයා වන ගාමිණී බී හේරත් මහතායි.
බෝට්ටු නිෂ්පාදන ක්ෂේත්රය තුළ ඇති වී ඇති ප්රගතිය පිළිබඳව ඉතා ආඩම්බරයෙන් අදහස් දැක්වීමට එක්වූ ඒ මහතා සඳහන් කළේ වත්මන් රජය යටතේ බෝට්ටු නිෂ්පාදන ක්ෂේත්රය තුළ සුවිශේෂ ප්රගමනයක් සිදු වී ඇති බවයි. මෙම කර්මාන්තය තුළින් ශ්රී ලංකාව රුපියල් බිලියන 12ක වාර්ෂික අපනයන ආදායමක් උපයන බවද කී ඔහු අපනයන ක්ෂේත්රය තුළ ඉදිරියට ගත හැකි කර්මාන්තයක් ලෙස හඳුනාගෙන ඇති මෙම බෝට්ටු නිෂ්පාදනය දිරි ගැන්වීම සඳහා ද වත්මන් රජය අඛණ්ඩව කටයුතු කරමින් සිටින බවද සඳහන් කළේය.
මෙම සාකච්ඡාවේදී තවදුරටත් අදහස් දැක්වූ බෝට්ටු නිෂ්පාදන තාක්ෂණය දියුණු කිරීමේ ආයතනයේ කළමනාකරන අධ්යක්ෂ ගාමිණී බී හේරත් මහතා -
මේ වන විට මෙම විෂයය පැවරී ඇත්තේ කර්මාන්ත හා වාණිජ අමාත්යාංශයටය. අමාත්යාංශය පැත්තෙන් අපේ කර්මාන්තය දියුණු කිරීමට විශාල වැඩපිළිවෙළක් ක්රියාත්මක වෙනවා.
බෝට්ටු නිෂ්පාදන තාක්ෂණ දියුණු කිරීමේ ආයතනයේ මෙහෙවර ඉතා විශාලය. අප ආයතනය මඟින් බෝට්ටු නිෂ්පාදනය හා අපනයන වෙළෙඳපොළ දියුණු කිරීම කෙරෙහි අවධානය යොමු කරනවා. එයයි අපගේ අරමුණ වන්නේ. ඊට අමතරව නිෂ්පාදන ආයතන සඳහා උපදේශන සේවාවද ක්රියාත්මක කරනවා.
මේ වනවිට ලංකාවේ බෝට්ටු නිෂ්පාදනය ඉදිරියෙන් සිටිනවා. අප ධීවර වරායන් සඳහා ධීවර බෝට්ටු නිෂ්පාදනය කරන අතර එක්දින ධීවර යාත්රා, බහුදින ධීවර යාත්රා, ට්රෝලර් යාත්රා ආදිය ප්රධානය. විනෝද කටයුතු සඳහා බෝට්ටු නිෂ්පාදනය, මගී ප්රවාහන බෝට්ටු, සංචාරක ක්ෂේත්රයට අදාළව, හෝටල් ලෙස බෝට්ටු නිෂ්පාදනය, බඩු ප්රවාහන බෝට්ටු, ගිනි නිවන බෝට්ටු, ඇම්බියුලන්ස් බෝට්ටු හා රුවල් නැව් ආදිය නිෂ්පාදනය කරනවා. එමෙන්ම මේ දිනවල යොට්ස් (රුවල් නැව්) සඳහා විශාල ඉල්ලුමක් පවතිනවා. එම එක නැවක් රුපියල් මිලියන 600ට අලෙවි කර අපනයන ආදායමක් උපයන්න පුළුවන්.
මේ වන විට බෝට්ටු නිෂ්පාදකයින් හා අපනයන සංවර්ධන මණ්ඩලය (FDB) ද දායක කර ගනිමින් මෙම කර්මාන්තයේ ඉදිරි දියුණුවට අවශ්යය අදහස් හා වැඩපිළිවෙළ යෝජනා කර ගැනීමට උපදේශන කමිටුවක් ද පත්කර තිබීම විශේෂයෙන් අගය කළ යුතුය.
මෙම අපනයන ක්ෂේත්රයේ ඉදිරි දියුණුව වෙනුවෙන් පසුගිය කාලය තුළ ජාතික අපනයන උපාය මාර්ගික සැලැස්මක් පිළියෙල වුණා. එහිදී මෙම කර්මාන්තය සඳහාත් විශේෂ අවධානයක් යොමු කර තිබෙනවා.
ඒ විතරක් නෙමෙයි. ලංකාවේ නිෂ්පාදනය කරන බෝට්ටු හා නැව්වල තත්ත්වය කිසියම් විදියකින් පාලනය කිරීම සඳහාත් තත්ත්වයෙන් උසස් කිරීම සඳහාත් මෙතෙක් කල් නියමිත ක්රමවේදයක් තිබුණේ නෑ. එම ක්රමවේදය දැන් සකස් කරගෙන යනවා. එමෙන් ම ලංකාවේ නිෂ්පාදනය කරන බෝට්ටු ලංකාවේ ලියාපදිංචි කරන්නත් නිසි ක්රමවේදයක් පැවතියේ නැහැ. ඒ සඳහාත් දැන් අප කටයුතු යොදා තිබෙනවා.
එමෙන්ම දැනට ලංකාවට පිටරටින් එන කුඩා යොට් යාත්රා පවා හරි ලියාපදිංචියක් කර තිබුණේ නැහැ. මේ නිසා සංචාරක ව්යාපාරය පැත්තෙන් ආදායම අහිමිවීමක් තිබුණා. මේ පිළිබඳව ද අවධානය යොමු කර එම නැව් ලියාපදිංචි කිරීම සඳහා ද වැඩපිළිවෙළක් සකස් කරනවා.
මීට අමතරව පිටරටින් එන යොට්ස් යාත්රා ගාල් කිරීමට ජැටියක් (මරිනා) මේ වන විට පෝට් සිටි යටතේ ඉදිවෙමින් පවතින අතර වැලිගම එවැනි දියකඩනයක් සඳහා සැලැසුම් සකස් කර තිබෙනවා. මෙය ඉදිකිරීම තුළින් ලංකාවේ බෝට්ටු විශාල ප්රමණයක් ගාල් කිරීමට හැකියාව ලැබෙනවා. එමෙන්ම එහි නව බෝට්ටු අංගණයක්, බෝට්ටු අලුත්වැඩියා කරන ස්ථානයක් වෙනම ඉදිකරන්නට ද සැලසුම් සකස් කර තිබෙනවා. මෙහි අවසන් අරමුණ වන්නේ 2025 වනවිට ඩොලර් මිලියන 500ක අපනයන ආදායමක් ඉපයීමයි.
මෙම බෝට්ටු නිෂ්පාදනවලට අදාළව ඉදිරියේදී පැවැත්වීමට නියමිත අන්තර්ජාතික ප්රදර්ශන රැසක් සඳහා ශ්රී ලාංකික නිෂ්පාදකයින් යොමු කිරීමට අපි බලාපොරොත්තු වෙනවා. ලබන ඔක්තෝබර් මස දකුණු අප්රිකාවේදී පැවැත්වෙන බෝට් ෂෝ ප්රදර්ශනය, 2020 ජනවාරියේදී ජර්මනියේදි පැවැත්වීමට නියමිත ප්රදර්ශනය, ලබන වසරේදී පැවැත්වෙන ඩුබායි එක්ස්පෝ ප්රදර්ශනය ආදි ජාත්යන්තර ප්රදර්ශන රැසකට අපගේ බෝට්ටු නිෂ්පාදකයින් සහභාගී කරවා මේ ක්ෂේත්රයේ අපගේ අපනයන වෙළෙඳපොළ පුළුල් කර ගැනීම සඳහා තව තවත් අලුත් ඇණවුම් ලබා ගැනීම අපගේ ප්රධාන ඉලක්කයක්.
එමෙන්ම ලංකාවේ බෝට්ටු නිෂ්පාදකයන්ගේ සංගමය තවදුරටත් පුළුල් කරමින් ලංකාවේ බෝට්ටු නිෂ්පාදනය හා අපනයනය සම්බන්ධයෙන් සිටින අනෙකුත් ආයතන සමඟ එකතු වී පුළුල් සංවිධානයක් හදන්න අපි කටයුතු කරමින් සිටිනවා.
විශාල බෝට්ටු හා නැව් නිෂ්පාදනය කරද්දී ඒවායේ තත්ත්වය සොයා බලන්න පහසුකම් නැහැ. ඒ සඳහා අපිට හොංකොං, එංගලන්තය වගේ රටවලට යන්න සිදුවෙනවා. එම නිසා දැනට අපි කර්මාන්තය හා වාණිජ කටයුතු අමාත්යාංශය සමඟ එක්ව, ජපානයේ ජයිකා ආයතනයත් සම්බන්ධ කරගෙන ඉදිරියේදී බෝට්ටු හා නැව් ටෙස්ට් කරන්න ස්ථානයක් පිහිටුවන්න කටයුතු කරනවා. (මොඩල් ටෙස්ටින් පැසිලිටි) එකක් හදන්න අවශ්ය දැනුම ලබා ගන්න නිලධාරින් ජපානයට යවන්න බලාපොරොත්තු වෙනවා.
අපි පසුගියදා බේරේ වැවේ බෝට්ටු, යාත්රා පටන් ගත්තා. අපිට අවශ්ය වන්නේ ජනතාව මේ සඳහා හුරු කරවීමයි. ඒ හරහා බෝට්ටු බල ගමනාගමනය පිළිබඳවත්, විනෝදයත් සංචාරක ව්යාපාරයත් දියුණු කිරීමටත් මේ හරහා අවස්ථාව සැලසෙනවා. මෙය රජයේ වැඩපිළිවෙළක්.
නුවර එළියේ ග්රෙගරි වැවේ ද එවැනිම බෝට්ටු සංචාර පටන් අරන් තියෙනවා. මෙවැනි ස්ථාන තෝරාගෙන ඉදිරියේදි තවත් දියුණු කරන්න බලාපොරොත්තු වෙනවා.