වසර ගණනාවකට පසු ශ්‍රී ලංකාවේ ක්‍රිකට් රසිකයන් සතුටු කර-ලීමට අපේ ජාතික ක්‍රිකට් කණ්ඩායමේ කනිෂ්ඨයන්ට හැකි විය. ඒ ඉකුත් පාකිස්තාන සංචාරයේදී මෙරට ක්‍රිකට් ක්‍රීඩාව නව මාවතකට ගෙන-එමිනි.
ලෝකයේ විස්සයි-20 ක්‍රිකට් තරගවල අංක එකේ රැඳී සිටින පාකිස්තාන කණ්ඩායම එරටදීම පරාජය කර-ලීමට දසුන් ශානකගේ නායකත්වයෙන් යුතු ශ්‍රී ලංකා විස්සයි-20 කණ්ඩායමට හැකි වීම විශේෂත්වයක් වන්නේ ඊට සහභාගි වූ ක්‍රීඩකයන් සියලු දෙනාම අත්දැකීම්වලින් ඉතා අඩු තත්ත්වයක පසුවීම හේතුවෙනි. එහෙත් ඔවුන් මේ තරගාවලිය පුරා තරග වැදුණේ අත්දැකීම් බහුල ශ්‍රී ලංකා ක්‍රීඩකයන්ටද යම් යම් පාඩම් කියා දෙමිනි.
දසුන් ශානක පන්දු යවන්නන් හැසිරවීමට මෙන්ම පන්දු රකින්නන් ස්ථානගත කිරීමට හා ප්‍රතිවාදි පිතිකරුවන් කඩුලු අතර සම්බන්ධතා ගොඩනඟද්දී ඒවා බිඳ-දැමීමට ගත් පියවර පිළිබඳ අද මුළු මහත් ලෝකයම කතා-බහ කරති. 
මේ තරගාවලියේදී ශ්‍රී ලංකා පිලේ පිතිකරණය, පන්දු යැවීම මෙන්ම පන්දු රැකීමද ඉතා උසස් තත්ත්වයක පැවති බව නොරහසකි. වනිඳු හසරංග දඟ පන්දුව කරකවද්දී කඩුලු දෙබෑ කර යෝකර් පන්දු යැවීමට නුවන් ප්‍රදීප් සමත් වූයේ 1996 ලෝක කුසලානය ජයග්‍රහණය කළ ක්‍රිකට් විරුවන් සිහිගන්වමිනි. ධනුෂ්ක ගුණතිලක, භානුක රාජපක්ෂ සහ ශෙහාන් ජයසූරියගේද පිත්ත ක්‍රියාත්මක වූයේ විස්සයි-20 ක්‍රිකට් ලෝකයට අලුතින් පායා එන තාරකාවන්හි ප්‍රභාව ප්‍රකට කරමිනි.
මෙහිදී විශේෂයෙන් අවධානය යොමු කළ යුතු ක්‍රීඩකයකු ගැන සටහනක් තැබිය යුතුමය. ඒ ඔහුගේ අනාගත ක්‍රිකට් වෙනුවෙනි. ඒ අන් කවරකු වත් නොව; භානුක රාජපක්ෂයි. අන්තර්ජාතික අත්දැකීම් සමුදායක් නොතිබුණද; දැනට දශකයකට වැඩි කාලයක් ශ්‍රී ලංකාවේදී පිත්තෙන් දස්කම් පෑමට ඔහු සමත්ව ඇති ආකාරය මේ උද්යෝගවත් යොවුන් ක්‍රීඩකයාගේ තරග ඉතිහාසය පිරික්සීමේදී පෙනී-යන කරුණකි.
වසර 10කට පසු ශ්‍රී ලංකා ජාතික කණ්ඩායමේ විස්සයි-20 තරගයකට සහභාගි වන භානුක කිසිදු පැකිළීමකින් තොරව පාකිස්තානයේ සුපිරි පන්දු යවන්නන්ට පහර දුන්නේ මෙරට ක්‍රිකට් බලධාරීන්ට තරු පෙනෙන්නටය.
2009 වසරේදී දකුණු අප්‍රිකාවේ පැවති යොවුන් ලෝක කුසලානයේදී ශ්‍රී ලංකා කණ්ඩායමේ නායකත්වය ගෙන ක්‍රීඩා කළ භානුක රාජපක්ෂ වසර 10ක් නිහඬ කර තබා මෙවර ශ්‍රී ලංකා කණ්ඩායමට කැඳවන විට ඒ ලෝක කුසලානයට සහභාගි වන විරාත් කෝලි තම රටෙන් දිගටම නිසි අවස්ථා ලබමින් ඉන්දීය පිලේ නායකයා බවට පත් වන්නේ ලෝකයේ ක්‍රිකට් තරුවක් බවට පත් වෙමිනි.
2009දී තරුණ කෝලි භානුක පිළිබඳ සඳහන් කර තිබුණේ භානුක යම් දිනක ශ්‍රී ලංකා කණ්ඩායම දිනවන ක්‍රීඩකයකු බවට පත් වනු ඇති බවයි. ඊට හේතු වී තිබුණේ මේ යොවුන් ක්‍රීඩකයා 2009 යොවුන් ලෝක කුසලානයේදී අනෙක් කණ්ඩායම්වලට දැඩි පීඩනයක් එල්ල කළ ක්‍රීඩකයකු වූ බැවිනි. වයස අවුරුදු 19 පහළ කණ්ඩායම නියෝජනය කළ ප්‍රථම අවස්ථාවේම භානුක බංග්ලාදේශ යොවුන් කණ්ඩායමට එරෙහිව ශතකයක් රැස් කරනුයේ සෙසු ක්‍රීඩකයන් පුදුමයට පත් කරමිනි.
කොළඹ රාජකීය විදුහලෙන් ක්‍රිකට් ලොවට පිවිසෙන භානුක මෙරට පාසල් ක්‍රිකට් පිටිය මෙන්ම ප්‍රධාන පෙළේ අන්තර්-සමාජ තරගාවලිවලදීද කැපී පෙනෙන පිතිකරුවකු මෙන්ම තරග රැසක් ජයග්‍රහණය කරවීමට සාධකයක් වූ පිතිකරුවෙක් වූයේය.
පළමු පෙළ තරග 67කට සහභාගි වී ඇති භානුක ලකුණු 3252ක් රැස් කර ඇත්තේ තරගයකදී 32.2ක සාමාන්‍යයක් පෙන්වමිනි. ඔහු තරග 110කට සහභාගි වී ලකුණු 2914ක් හිමි කරගෙන ඇත්තේ 31.01ක සාමාන්‍යයක් මෙන් ම 97.7ක ප්‍රහාරක වේගයක් සතු කරගෙනය.
මෙරටදී විස්සයි-20 තරග 85කට සහභාගි වූ භානුක එහිදී ලකුණු 1087ක් රැස් කරගෙන තිබේ. එහිදී ඔහුගේ ලකුණු රැස් කිරීමේ සාමාන්‍යය 24.7ක් වන අතර, ප්‍රහාරක වේගය 129.1කි.
මේ වන විට අන්තර්ජාතික විස්සයි-20 තරග 3කට සහභාගි වී ඇති භානුක ලකුණු 112ක් රැස් කරගෙන ඇත්තේ පහරදීමේ වේගය 143.6ක් වැනි ඉතා ඉහළ අගයක පවත්වාගනිමිනි. තරගයකදී ලකුණු 38ක සාමාන්‍යයක් ඔහු විසින් රඳවාගෙන සිටියි. මේ සුවිශේෂ ක්‍රීඩකයා වසර 10ක පමණ කාලයක් තම හදවතට කතා කරමින් කවරදා හෝ ශ්‍රී ලංකා ජාතික කණ්ඩායමට ඇතුළු වන බව අධිෂ්ඨාන කරගනිමින් ක්‍රියා කිරීම සෑම ක්‍රීඩකයකුටම හොඳ ආදර්ශයකි.
මෙරට ක්‍රිකට් ක්‍රීඩකයකුට පාසල් කාලයේදී පිරිනැමෙන අංක එකේ කුසලානය ලෙස සැලකෙන ‘සන්ඩේ ඔබ්සර්වර් මොබිටෙල් වසරේ පාසල් ක්‍රිකට් ක්‍රීඩකයා’ සම්මානය 2010 සහ 2011 වසරවලදී භානුක රාජපක්ෂ විසින් දිනාගැනීම විශේෂ සිද්ධියකි. මීට ඉහතදීද මේ ආකාරයට තේරී පත් වූ ක්‍රීඩකයෝ රැසක් මේ වන විට වර්තමාන ජාතික කණ්ඩායම නියෝජනය කරති.
දැනට ශ්‍රී ලංකා A කණ්ඩායමට නායකත්වය දෙන කමිඳු මෙන්ඩිස් ක්‍රීඩකයාද ‘සන්ඩේ ඔබ්සවර්’ සම්මානයට පත් වූ ක්‍රීඩකයෙකි. කොළඹ රාජකීය විද්‍යාලයෙන් මේ සම්මානයට හිමිකම් කීමට සමත්ව ඇත්තේ ක්‍රීඩකයෝ තිදෙනෙක් පමණි. ඉකුත් දා අවසන් වූ අන්තර්-පළාත් ටෙස්ට් හා එක්දින තරගාවලියේදී භානුක නියෝජනය කළේ ගාලු කණ්ඩායමයි. එහිදී අන්තර්-පළාත් එක්දින ශූරතාව ජයග්‍රහණය කරගන්නේ ගාල්ල කණ්ඩායමයි. ඒ ජයග්‍රහණයේදී භානුක විශාල කාර්යභාරයක් සිදු කළේය.
අවුරුදු 13න් පහළ ක්‍රිකට් කණ්ඩායම නියෝජනය කළ භානුක එහිදී කඩුලු රකින්නකු ලෙස ක්‍රීඩා කළේය. එහෙත් පසුව ඔහු තුන් ඉරියව් ක්‍රීඩකයකු බවට පත් වෙයි. එකල ඔහු තම ක්‍රිකට් දිවිය තුළ හයේ පහරවල් රාශියක් එල්ල කිරීමට සමත් වූ බව ඔහුගේ සමකාලීන ක්‍රීඩකයෝ සඳහන් කරති.
“මම ක්‍රිකට් ක්‍රීඩාවට සම්බන්ධ වූ දවසේ සිට ක්‍රිකට්වලට ආදරය කළා. මගේ මුළු ජීවිතයම වුණේ ක්‍රිකට්. ජාතික කණ්ඩායම නියෝජනය කරමින් එක් තරගයක් හෝ ක්‍රීඩා කිරීම මගේ අරමුණ වුණා. අද මම ඒ ජයග්‍රහණය හිමි කරගෙන තිබෙනවා” යැයි භානුක රාජපක්ෂ මාධ්‍ය වෙත අදහස් දක්වමින් කීය. එහිදී ඔහු මෙසේද පැවසීය:
“මම පාසල් ක්‍රීඩාවෙන් සමු ගන්නා විටම මට අන්තර්-පළාත් හා අන්තර්-සමාජ ක්‍රීඩාවට සම්බන්ධ වෙන්න හැකි වුණා. ඒ හැම අවස්ථාවකදීම මම පුළුවන් උපරිම දේ මගේ කණ්ඩායම වෙනුවෙන් ඉටු කළා. 2009 ඉඳලා මේ වෙන කල් අවුරුදු දහයක කාලයක් මම ප්‍රධාන පෙළේ තරගවල හොඳින් ක්‍රීඩා කළා. අවසානයේ ජාතික කණ්ඩායමට ඇතුළත් වෙලා අවස්ථාව ලැබුණු තරගාවලිය ජයග්‍රහණය කරන්න මගේ පිත්තෙන් උපරිම සහයෝගය දුන්නා. මට මේ ජයග්‍රහණය පිළිබඳ ලොකු සතුටක් තිබෙනවා. තරුණ කණ්ඩායමක් ලෙස සහභාගි වෙලා ප්‍රබල පාකිස්තානුවන් පරාජය කිරීම පිළිබඳ වඩාත් සතුටු විය හැකියි.
මම ආගමට ගොඩක් නැඹුරුයි... දෙවියන් වහන්සේ විශ්වාස කරනවා. මගේ විශ්වාසය අද ජයග්‍රහණය කර තිබෙනවා.”
ප්‍රථම පන්දුවේ සිට භානුක පාකිස්තාන පන්දු යවන්නන්ට පහර දුන් අයුරු ක්‍රිකට් විචාරකයන් පුදුමයට පත් කළ බව මාධ්‍ය වාර්තා සඳහන් කර තිබිණි. එලෙසම භානුක ශ්‍රී ලංකා කණ්ඩායමේ නව සොයාගැනීමක් ලෙසද ඔවුහු අවධාරණය කොට සිටියහ.
ලාහෝර් ක්‍රීඩාංගණයේදී පන්දු 48කට මුහුණ දෙමින් ලකුණු 77ක් රැස් කළ ඔහුගේ ඉනිමට හයේ පහරවල් 6ක් සහ හතරේ පහරවල් 4ක් ඇතුළත් විය. මෙය මෑතකදී ශ්‍රී ලංකා පිතිකරුවකු විස්සයි-20 තරගයකදී දැක්වූ හොඳම පිතිකරණය ලෙස විචාරකයෝ පෙන්වා දෙති.
ඉදිරියේදී පැවැත්වෙන ඕස්ට්‍රේලියා තරග සංචාරයට ශ්‍රී ලංකා ක්‍රිකට් පරිපාලකයන් භානුක රාජපක්ෂ සහභාගි කරවනු ඇතැයි ක්‍රිකට් ප්‍රේමීන් බලා සිටින අතර, භානුක ස්ථිරවම ඉදිරියේදී ශ්‍රී ලංකා කණ්ඩායමේ සිටිනු ඇතැයිද ඔවුහු ක්‍රීඩාවේ නාමයෙන් අපේක්ෂා කරති.
