අපේ මුතුන් මිත්තන් හිරු එළියට බියෙන් සන් ක්‍රීම් හෝ වැස්ලීන් ඇඟ ගල්වාගෙන නොසිටි බව කවුරුත් දනිති. ඔවුන් අව්වේ පිටතට යෑමට අප මෙන් බිය වූවේ ද නැත. ඇත්ත වශයෙන්ම, ඔවුහු එය ජීවිතයේ මූලිකාංගයක් ලෙස දුටහ. නමුත් ඔවුන් එසේ හිරු එළියට බිය නොවී තම දින චර්යාව සිදු කරගැනීම ඔවුන්ගේ ජීවිතවලට ඉමහත් ප්‍රතිලාභ ගෙන දීමට හේතු වූවක් බව, කොටින්ම ඒ ප්‍රතිලාභ ඔවුන්ගේ ඇට කටු ශක්තිමත් කිරීමේ සිට, පිළිකා, හදවත් රෝග වලින් වැළකී දීර්ඝායුෂ විඳීම දක්වා වන පුළුල් පරාසයක විහිදුණු බවත් ඔබ දැන සිටියාද?
සන් ක්‍රීම්
එහෙත් ප්‍රධාන ධාරාවේ සෞඛ්‍ය උපදේශය වන්නේ හිරු එළියෙන් සැඟවී පලායෑම ය. ගෝලීය සන්ස්ක්‍රීන් සහ ශරීරාලේපන කර්මාන්තයෙ වපසරිය මේ වන විටත් වසරකට ඇමරිකන් ඩොලර් බිලියන 15ක් පමණ වෙයි. එය ඉදිරි වර්ෂ 5 තුළ දී බිලියන 24ක් දක්වා ප්‍රසාරණය වෙතැයි ගණන් බලා තිබේ. රුපියල්වලින් නම් එය, රුපියල් කෝටි හාරලක්ෂ තිස්තුන් දාහක් ඉක්මවා යන වෙළෙඳපොළකි. ශරීරාලේපන කර්මාන්තකරුවන් බිලියනපතියන් කළ පෙර කී ජනප්‍රිය වෛද්‍ය උපදේශය අකුරටම විශ්වාස කිරීම නිසා, වෙළෙඳ දැන්වීම්වල කියන කියන ශරීරාලේපන ඇඟ ගල්වාගෙන හිරුට බියෙන් සැඟවෙන්නට හදන අසරණ පාරිභෝගිකයන් කෝටි ගණනක් අමාරුවේ දමා තිබෙන බව, අධ්‍යයන වාර්තා කියවීමෙන් හෙළි වෙයි.
පිළිකා හැදෙන්නේ සූර්යයාට මුහුණ දීමෙන් ද, වහන් වීමෙන් ද?
සූර්යයා යනු අපගේ සමේ තානයේ වාද්‍ය වෘන්දයයි. සමේ වර්ණය සෑදී ඇත්තේ මෙලනීන්වලිනි. මෙලනීන් අහිතකර සූර්ය විකිරණවලින් අපේ සම ආරක්ෂා කරන ස්වභාවික රැකවලා වේ. 
මීට අවුරුදු පනස් දහසකට පෙර අපගේ කාල වර්ණ සමක් ඇති අප්‍රිකානු මුතුන් මිත්තෝ උතුරට සංක්‍රමණය වී යුරෝපයේ හා ආසියාවේ පදිංචි වූහ. එසේ උතුරට ගිය අපගේ ඥාතීන්ට අඩු තීව්‍රතාවක් සහිත හිරු එළියට පරිණාමය වන්නට සිදු විය. ඔවුන්ට තවදුරටත් හිරු කිරණේ අහිතකර බලපෑමට යටත් වන්නට අවශ්‍ය වන්නේ නැත. ඒ අනුව ඔවුන්ට මෙලනින්වල පැවැත්ම තීරණාත්මක නැත. හිරු එළිය අඩුවෙන් ලැබෙන ධ්‍රැවාසන්න ප්‍රදේශවල පරිණාමය වූ මනුෂ්‍යන්ගේ සම මත පෙර කී මෙලනින් ඇත්තේ අඩුවෙන්ය. ඔවුන් සුද්දන් සහ සුද්දියන් වූවේ එසේ ය.
සූර්යයාගේ පාරජම්බුල කිරණවලට වැඩි කාලයක් නිරාවරණය වීම නිසා විශේෂයෙන් සුදු ජාතිකයන්ගේ චර්ම සෛලවලට වැඩි හානියක් සිදු කරයි. ඇමරිකානු පිළිකා සංගමයට අනුව, සමට අහිතකර ලෙස බලපාන ප්‍රධාන ප්‍රභවය පාරජම්බුල කිරණ වේ. පසුගිය සියවස් කිහිපය තුළ සුදු මිනිසුන් ලෝකය පුරා සංක්‍රමණය වීමට පටන්ගැනීමත්, ඔවුන්ගේ චර්යා සහ සංස්කෘතික ලක්ෂණ වෙනස් වීමත් නිසා අහිතකර සූර්ය විකිරණවලට ගොදුරු වීම වැඩි විය. එහි ප්‍රතිඵලයක් ලෙස චර්ම පිළිකා වසංගතයකට සුදු ජාතිකයෝ ගොදුරු වූහ. එකී චර්ම පිළිකා භීතිකාවෙන් ජනතාව බේරාගැනීම සඳහා ඉදිරිපත් වූයේ විද්‍යාඥයන් නොව, පුළුල් පරාසයක සන්ස්ක්‍රීන් ඇතුළු චර්මාලේපන කර්මාන්තකරුවෝ ය.
අඳුරු සමක් ඇති පුද්ගලයන්ට සමේ පිළිකා ඇති වීමේ අවදානම යුරෝපීය සුදු සමක් ඇති අයට වඩා අඩුය. මන්ද ඔවුන්ගේ සමේ මෙලනින් වැඩි ප්‍රමාණයක් ඇති බැවිනි. අප්‍රිකාවට සමීපව සිටි මිනිසුන් සහ සමකයට ආසන්නව සිටි මිනිසුන්ගේ සමේ ස්වාභාවිකවම වැඩි මෙලනින් ප්‍රමාණයක් නිපදවන අතර, එකී ස්වභාවික සංසිද්ධිය නිසා අඳුරු සමක් ඇත්තන්ට හිරු කිරණින් ඉමහත් ආරක්ෂාවක් සැලසේ. ගෝලීය චර්ම පිළිකාවලට අදාළ දත්ත පරික්ෂා කිරීමේදී එම තත්ත්වය මැනවින් ප්‍රකට කෙරෙයි.
ලොව වැඩියෙන්ම චර්ම පිළිකා වාර්තා වන රටවල් 20ම සුදු සම් ඇත්තන් සුලභව ජීවත් වන යුරෝපා රටවල් වන අතර, කළු සහ තලෙළු ඡවි වර්ණ ඇති රටවල්වල චර්ම පිළිකා වාර්තා වීම් ඉතා අවම අගයක් ගනී. ලොව වැඩිම චර්ම පිළිකා රෝගීන් ප්‍රමාණයක් වාර්තා වන ඕස්ට්‍රෙලියාවේ සුදු ජාතිකයන්ගෙන් තුන් දෙනෙකුගෙන් දෙදෙනෙකුටම ජීවිත කාලය තුළ දී චර්ම රෝගයක් වැලඳෙන බව වාර්තා වෙයි. https://www.cancer.org.au/about-cancer/types-of-cancer/skin-cancer.html
2017 දී ප්‍රකාශයට පත් කරන ලද ලෝක සෞඛ්‍ය සංවිධානයේ දත්ත වලට අනුව ශ්‍රී ලංකාවේ සමේ පිළිකා මරණ අනුපාතය 0.17%කි. චර්ම රෝග වාර්තා වීම අතින් ලංකාව සිටින්නේ 128 වන ස්ථානයේ ය. චර්ම පිළිකා සඳහා ආහාරයේ සහ ජලයේ අන්තර්ගත ආසනික් බැර ලෝහය සහ චර්මාලේපනවල අන්තර්ගත රසදිය, ඊයම් වැනි බැරලෝහ ද බලපායි. පසුගිය දසක කිහිපයේ දී ඉවක් බවක් නැතිව තීව්‍ර කෙරුණු රසායනික ගොවිතැනේ කරුමය නිසා සහ නියාමනයක් සහ නීති ප්‍රතිපාදනයකින් තොරව වෙළෙඳපොළ ආක්‍රමණය කර තිබෙන චර්මාලේපන වර්ග, ඇඟ ගැල්වීමට මෙරට පාරිභෝගිකයන් පෙලඹී සිටින නිසා ආසනික්, රසදිය සහ ලෙඩ් වැනි බැරලෝහ ශරීරගත වීමේ අවදානමක් ද සහිතව මෙරට ජනතාව ජීවත් වෙති.
එබැවින් අහිතකර සූර්ය කිරණ නිසා පමණක් වැලඳෙන චර්ම පිළිකා ප්‍රමාණය තවත් අඩු විය හැකිය. චර්ම පිළිකා බිල්ලා විකුණන් කන විලවුන් කර්මාන්තකරුවන් විසින් මුළුමනින්ම පාහේ අණසකට නතු කර ගෙන සිටින ඉන්දියාව ද චර්ම පිළිකා අඩුවෙන්ම වාර්තා වන රටකි.
දරුණු පිළිකා සහ විටමින් ඩී උෟනතාව අතර ළඟ සම්බන්ධයක්.
විටමින් ඩී ඌනතාව, සෞඛ්‍යමය ප්‍රතිවිපාක රාශියක් ඇති කරන බරපතළ සෞඛ්‍ය ගැටලුවක් වෙයි. එය දියවැඩියාව, රූමැටික් ආතරයිටිස්, පාකින්සන්, ඇල්සයිමර් රෝගය, ඔස්ටියෝමාලේෂියා, ඔස්ටියෝපොරෝසිස් සහ පිළිකාවල සිට අස්ථි බිඳීම් දක්වා සම්බන්ධ වේ. බොහෝ පර්යේෂණ මඟන් සීරම් විටමින් ඩී සාන්ද්‍රණය සහ පියයුරු, මහාන්ත්‍ර, වකුගඩු, පෙණහලු සහ අග්න්‍යාශය ඇතුළු පිළිකා කිහිපයක් ඇති වීම සමඟ ප්‍රතිලෝම සම්බන්ධතාවයක් පෙන්නුම් කර ඇත. ඇතැම් අධ්‍යයන වාර්තා පෙන්වා දෙන්නේ, විවිධ පිළිකා වර්ග 20ක් පමණ සූර්ය පාරජම්බුල කිරණ හා රුධිරගත විටමින් ඩී සාන්ද්‍රණයට ප්‍රතිලෝමව සම්බන්ධ වන බව යි.
පෘතුවියේ සූර්යයාගේ පාරජම්බුල කිරණ වැඩි ප්‍රමාණයක් ලබා ගන්නා ස්ථානවල ජීවත් වන පුද්ගලයන්ට අවම වශයෙන් පිළිකා ඇති බව ඔබ දැන සිටියාද?. එයින් අදහස් කරන්නේ සූර්යාලෝකය පිළිකා වැලඳීමේ අවදානම අඩු කරන බවයි.
වැඩි හිරු එළියක් ලබා ගැනීමට හැකි මිනිසුන්ට පිළිකා වැලඳීමේ අවදානම අඩු බව 2016 වර්ෂයේ දී ඩර්මටෝ එන්ඩොක්‍රයලොජි ජර්නලයේ පළ කෙරී තිබුණු පර්යේෂණ වාර්තාවකින් ද හෙළි වී ඇත. හිරු එළිය සමේ පිළිකා, පුරස්ථි පිළිකා, පෙණහලු පිළිකා, මහාන්ත්‍ර පිළිකා, ලියුකේමියාව, පියයුරු පිළිකා, මුත්‍රාශයේ පිළිකා සහ ලිම්ෆෝමා පිළිකා අවදානම සැලකිය යුතු ප්‍රමාණයකින් අඩු කරන බව හෙළි වී ඇත. https://www.ncbi.nlm.nih.gov/pmc/articles/PMC4862378/
විටමින් ඩී ඌනතාව දරුණු ගණයේ පියයුරු පිළිකාවට හේතු වන බව, ලොව පුරා සිදු කර ඇති අධ්‍යයන ගණනාවකින්ම තහවුරු වී තිබේ. පියයුරු පිළිකා රෝගය සඳහා ප්‍රතිකාර ගන්නා අතරම විටමින් ඩී අතිරේකයන් ද ලබා ගන්නා රෝගීන්ගේ රෝගය සුව වීම සඳහා වැඩි ප්‍රවණතාවයක් පෙන්නුම් කරන බව නවතම අයර්ලන්ත පර්යේෂණයක් හෙළිදරව් කරයි. https://www.irishtimes.com/news/health/irish-researchers-find-vitamin-d-...
පියයුරු පිළිකා ඇති කාන්තාවන් අතර, විටමින් ඩී ඌනතාව බහුලව දක්නට ලැබෙන අතර, එය පිළිකාව පැතිරීමේ හා මරණයට පත් වීමේ අවදානම වැඩි කරන බව සොයාගෙන තිබේ. පියයුරු පිළිකාවක් හඳුනාගන්නා මුල් අවස්ථාවේදී විටමින් ඩී ඌනතා‍ෙවන් පෙළෙන කාන්තාවකගේ පිළිකාව පැතිරීමේ අවදානම 94%ක් පමණ වන බවත්, විටමින් ඩී ඌනතාවෙන් නොපෙළෙන පියයුරු පිළිකා රෝගියෙකුට සාපේක්ෂව, ඌනතාවෙන් පෙළෙන රෝගියකු ඉදිරි වසර 10 තුළ, මිය යෑමේ අවදානම 73% ක් බවත් තවත් අධ්‍යයනයකින් හෙළි වී ඇත. https://www.webmd.com/breast-cancer/news/20080516/vitamin-d-deficiency-w...
මේ අනුව බොහෝ අධ්‍යයනවලින් කියවෙන්නේ පෙර කී මාරාන්තික පිළිකා රෝගවලින් වැළකී සිටින්නට වුවමනා අය සහ එකී පිළිකා රෝගවලට ප්‍රතිකාර ගන්නා රෝගීන්ද, තම දෛනික විටමින් ඩී අවශ්‍යතාව 
ප්‍රමාණවත් ලෙස සපුරාගැනීම කෙරෙහි උනන්දු වීම අත්‍යවශ්‍ය බවයි.
මිනිස්සු බිලියනයක් අනතුරේ
ලොව පුරා විටමින් ඩී ඌනතාවෙන් පෙළෙන සංඛ්‍යාව ආසන්න වශයෙන් බිලියනයකි. ලෝකයේ මනුෂ්‍ය ජනගහනය මේ වන විට ආසන්න වශයෙන් බිලියන 7.7කි. වෙනත් වචනවලින් කිවහොත්, පෘථිවිවාසි සෑම මිනිසුන් අට දෙනෙකුගෙන් එක් අයෙක් විටමින් ඩී ඌනතාවෙන් පෙළෙයි. හිරු එළිය ප්‍රමාණවත්ව නොලැබෙන ධ්‍රැවාසන්න රටවල්වල ජනතාව තුළ මුලින් පැවති විටමින් ඩී ඌනතාව මේ වන විට වසර පුරාම ඇති පදම් හිරු එළිය ලැබෙන සමකය ආසන්න රටවල්වල ද බරපතළ සෞඛ්‍ය ගැටලුවක් වෙමින් පවතින බව අධ්‍යයනවලින් පෙන්නුම් කෙරේ.
සංස්කෘතික හේතු, චර්යා රටා සහ රැකීරක්ෂා ශීඝ්‍රයෙන් වෙනස් වෙමින් තිබෙන, එමෙන්ම විලාසිතා සහ රූපලාවණ්‍ය නිෂ්පාදනවල උමතුව විසින් ගිලගත්, එහෙත් හිරු එළිය හොඳින් ලැබෙන රටක් වන අපගේ අසල්වාසි රටේ සිදු කර තිබෙන අධ්‍යයනයකින් හෙළි වී තිබෙන තොරතුරු අප මවිත කරවන සුලුය. සමස්ත ඉන්දියානු ජනගහනයෙන් සියයට 79.33කට ආසන්න පිරිසක් විටමින් ඩී ඌණතාවෙන් පෙළෙන බවත්, ඉන්දියාවේ කාන්තාවන්ගෙන් සියයට 81.39ක් විටමින් ඩී ඌනතාවෙන් පෙළෙන බවත්, විකලාංග විද්‍යාව පිළිබද අන්තර්ජාතික සඟරාවේ අධ්‍යයනය වාර්තාවක පෙන්වා දෙයි.
https://pdfs.semanticscholar.org/bc57/3482c82eb98b4cdd5319cb92a86f44dbdc...
ඉන්දියාවටත් වඩා හිරු එළිය යහමින් ලැබෙන අරාබි රටවල සිදු කර තිබෙන අධ්‍යයනයන්වල ප්‍රතිඵල ඊටත් වඩා ඛේදනීය තත්ත්වයක් පෙන්නුම් කරයි. සවුදි අරාබියේ කිං සවුඩ් විශ්වවිද්‍යාලයීය වෛද්‍ය විද්‍යාලයේ සිදු කර තිබෙන අධ්‍යයනයකට අනුව, එරට ගර්භිණී මවුවරුන්ගෙන් සියයට 85කට වඩා සංඛ්‍යාවක් සහ නව ජන්මීන්ගෙන් සියයට 88කට වඩා වැඩි සංඛ්‍යාවක් විටමින් ඩී ඌනතාවට ගොදුරුව සිටින බව හෙළි වී ඇත. එවැනි අධ්‍යයන කිහිපයක්ම පසුගිය වසරවල දී අරාබි රටවල සිදු කෙරී තිබෙන අතර, සංස්කෘතික සහ ආගමික හේතු මත, ආරාබි රටවල පිරිමි පක්ෂයට වඩා අඩුවෙන් හිරු එළිය ලබන කාන්තාවන් පිරිමින්ට සාපේක්ෂව වැඩි විටමින් ඩී ඌනතාවකින් පෙළෙන බවත් මෙම අධ්‍යයන වැඩිදුරටත් හෙළි කරයි. https://www.ncbi.nlm.nih.gov/pubmed/?term=Extremely+High+Prevalence+of+M...
සාමාන්‍යයෙන් ස්ත්‍රීන්ට වඩා පුරුෂයන් අතර පිළිකා රෝග බහුල බව, ස්ත්‍රී පුරුෂ භාවය අනුව පිළිකා රෝග වැලඳීම පිළිබඳ ගෝලීය දත්ත අධ්‍යයනය කිරීමෙන් වටහාගත හැකිය. එහෙත් විටමින් ඩී ඌනතාවට වැඩිපුර ගොදුරුව සිටින ස්ත්‍රීන් ජීවත් වන රටවල පිරිමි පාර්ශ්වයට වඩා ස්ත්‍රීන් අතර පිළිකා වැලඳීමේ ප්‍රවණතාව ඉහළ යෑමට විටමින් ඩී ඌනතාව බලපා ඇත්දැයි විමසා බැලිය යුතුව ඇත. ශ්‍රී ලංකාව, ඉන්දියාව සහ අරාබි රටවල් ද පිරිමින්ට සාපේක්ෂව ස්ත්‍රීන්ට පිළිකා රෝග වැලඳීමේ අවදානම වැඩි රටවල් අතර වෙයි.
විටමින් ඩී උනතාවෙන් දරුණු ලෙස පෙළෙන අරාබි රටවල ස්ත්‍රීන් අතර පිළිකා රෝගය ශීඝ්‍රයෙන් ඉහළ යමින් පැවතීමට වෙනත් හේතු අතර විටමින් ඩී ඌනතාව ද බරපතළ සාධකයක් විය හැකිය. https://www.timesofisrael.com/cancer-cases-drop-among-men-almost-double-...
විටමින් ඩී ලබාගන්න වැඩි කාලයක් අව්වේ සිටිය යුතු වේද?
හිරු එළියේ තිබෙන බී නැමති පාරජම්බුල කිරණවලට (UV-B) සම නිරාවරණය වීමේ දී සමේ විටමින් ඩී සංශ්ලේෂණය වෙයි. මානවයාගේ ප්‍රධානම විටමින් ඩී ප්‍රභවය වන්නේ ද හිරු එළියයි. එය ආහාරවලින් හෝ විටමින් පෙති, අතිරේකවලින් ලගන්නවාට වඩා ලාභදායක සහ ගුණාත්මක ප්‍රභවය ද වෙයි. මෙලනින් වැඩි කළු සමක් ඇති අයට අවශ්‍ය විටමින් ඩී ප්‍රමාණය සංශ්ලේෂණය කර ගන්නට වැඩි කාලයක් උදෑසන හිරු එළියට නිරාවරණය වීමත්, පැහැපත් සහ සුදු සමක් ඇති උදවියට ඊට අඩු කාලයක් ද අවැසි වෙයි.
පාරජම්බුල කිරණවලින් අනතුරක් නොවන පෙරවරු දහය දක්වා වන උදෑසන කාලයේ දී සමේ පැහැය අනුව, හිරු එළියට මිනිත්තු 15 ත් 45 ත් අතර කාලයක් අවම වශයෙන් මුහුණ සහ දෙඅත් නිරාවරණය කරගැනීම ප්‍රමාණවත් බව, විද්‍යාඥයන් හා චර්ම රෝග විශේෂඥයන් යෝජනා කරනවා. මෙවැනි කෙටි කාලයක්වත් සූර්යාලෝකයට නිරාවරණය වී සිටින්නට වත්මන් ලෝකයේ මිනිසුන්ට අවස්ථාවක් නැති වීම සහ උනන්දුවක් නැති වීමේ ආදීනව සිය ජීවිතවලින් ගෙවා දමමින් සිටී.
අපේ රටේ තත්ත්වය
ශ්‍රී ලාංකිකයන් වන අප ප්‍රමාණවත් හිරු එළියක් ලබාගන්නවා ඇතැයි ද, අපේ රටේ උදවිය අතර විටමින් ඩී ඌනතාව බරපතළ ලෙස නැති බවත් අපි කලක් විශ්වාස කළෙමු. එහෙත්, අපේ රටේ බොහෝ දරුවන් හා වැඩිහිටියන් විටමින් ඩී ඌණතාවයෙන් පෙළෙන බව අධ්‍යයනවලින් පැහැදිලිවම පෙනී ගොස් ඇතැයි, ශ්‍රී ලංකාවේ පළමු ළමා අන්තරාසර්ගවේදී විශේෂඥ වෛද්‍ය නවෝදා අතපත්තු මහත්මිය පවසන්නීය. http://www.sundaytimes.lk/170716/mediscene/let-the-sun-shine-on-you-2497...
මෑත කාලයේ දී, මෙරට ජනතාව වසඟකාරි, අධිපාරිභෝජන ජීවන රටාවකට ආසක්ත වීම හේතුවෙන් සොබාදහමෙන් මෙන්ම සූර්යාලෝකයෙන් ද වේගයෙන් ඈත් වෙමින් සිටිති. ලාංකිකයන් වන අපගේ වර්තමාන ජීවන රටාව, මුළුමනින්ම හිරු එළියෙන් සැඟවෙන්නට අනුබල දෙන්නක් වෙයි. මේ වන විට බොහෝ දරුවන් හිරු එළියේ ඇවිදීම සඳහා පිටතට ගෙන යන බවක් දැක ගන්නට නොහැකිය. වැඩිහිටි දරුවන් එළිමහනේ සෙල්ලම් නොකරන බවත් ඔවුන් පරිගණකවලට ඇලී ගැලී සිටින නිසා හෝ රූපවාහිනිය අසල හෝ උපකාරක පන්තිවල දිවා කාලය ගත කරන බැවින් සූර්යයාට නිරාවරණය වීම බෙහෙවින්ම අඩු ය.
වැඩිහිටියන් වූ පසු ද ඔවුහු සූර්යාලෝකය ඇඟේ වැදීමට බියක් දක්වති. සූර්යාලෝකය යහමින් වැටෙන කාල වේලාවල්වලදී එක්කෝ මහමඟ වාහනවල ය. නොඑසේනම්, කාර්යාලවලය. ලංකාවේ ස්ත්‍රීන් බොහෝ දෙනෙකුට උදේ වරුවේ හිරු එළියේ පහස විඳින්නට නොහැකි වී තිබේ. ඒ, ඔවුන් උදේ වරුවේ පවා, මහමඟ ගමන් බිමන් යෑමේ දී හිරු ආවරණ අලේපන ගල්වා, කුඩයක් ඉහලා ගෙන යෑමට පුරුදු වී සිටින නිසා ය. වෙළෙඳ දැන්වීම්වලින් පතුරුවන සුදු වීමේ උමතුව මේ තත්ත්වය තව තවත් තීව්‍ර කර ඇත.
ලංකාවේ පාසල්වල ද මේ වන විට හිරු එළියේ ගත කරන විෂය බාහිර ක්‍රියාකාරිත්වයන් බරපතළ ලෙස උදාසීන කර දමා තිබේ. රටේ තවත් කණ්ඩායමක් ඔවුන්ගේ ආගමික විශ්වාසයන් නිසා සම්පූර්ණයෙන්ම සිරුර වසාගෙන හිරුට මුවා වී සිටීමේ සංස්කෘතික රැල්ලකට යට වී සිටිති. නව දැනුමෙන් යථාවත් නොවන මෙරට ජනතාව හිරුගෙන් වසං වී බරපතළ ලෙස තම සෞඛ්‍ය තත්ත්වය අනතුරේ වට්ටවා ගනිමින් සිටින බව සිහිය ඇත්තන් විසින් කල්පනාවට ගත යුතුව ඇත. අධ්‍යාපන, සෞඛ්‍ය, සංස්කෘතික අංශවල මෙන්ම රටේ පාලනාධිකාරිත්වය ද ජනතාවට හිරු එළිය ප්‍රමාණවත්ව සහ ගුණාත්මකව ලැබීම සහතික කරන නව්‍ය ක්‍රමවේද ස්ථාපනය කිරීම කෙරෙහි අවධානය යොමු කළ යුතුව ඇත.
